Plantun de Prouvènço

Pèr coumpara dos planto d'encò nostre

Bolboschoenus glaucus & Schistidium crassipilum

Triangle(-verdau)

Bolboschoenus glaucus

Cyperaceae

Àutri noum : Liandro, Triangle.

Noms en français : Scirpe glauque, Souchet glauque.

Descripcioun :
Aquéu triangle dóu gènre Bolboschoenus (planto nousado emé de lòngui fueio) trachis dins li canau, roubino e li limoun de ribiero. Fai gaire qu'es esta destria dóu triangle-marin en raport emé la formo de la grano. Subretout vèn pas dins li relarg mounte i'a de sau au contro dóu marin. Lis espigo soun pamens mai longo eici. Èi pu tihous de faire la diferènci emé Bolboschoenus laticarpus ; pèr acò fau regarda la formo de la grano e l'espessour de l'"exocarpus" (pu pichoto eici). Coumpara emé lou triangle-di-làrgi-fru que ié sèmblo proun.

Usanço :
Se pòu gaubeja pèr la banastarié, mai avèn ges d'entresigne precis. Escriéure au site se n'en sabès mai. Li canard e lis auco manjon si boudougno.

Port : Grando erbo
Taio : 1 à 2 m
Fueio : costo paralèlo
Tipe bioulougico : Geoufite
Cicle bioulougico : Planto renadivo

Gènre : Bolboschoenus
Famiho : Cyperaceae

Ordre : Poales

Coulour de la flour : Brunello
Petalo : ges
Ø (o loungour) enflourejado : 1 à 4 cm
Flourido : Printèms - Estiéu

Sòu : Ca
Autour basso e auto : 0 à 900 m
Aparado : Noun
Mai à setèmbre

Liò : Ribiero - Roubino - Canau
Estànci : Termoumediterran à Mesoumediterran
Couroulougi : Paleousubretroupicalo
Ref. sc. : Bolboschoenus glaucus (Lam.) S.G.Sm., 1995 (= Scirpus glaucus Lam., 1791 )

Grimìo-de-la-pouncho-espesso

Schistidium crassipilum

Grimmiaceae

Nom en français : Grimmie à pointe épaisse.

Descripcioun :
La grimìo-de-la-pouncho-espesso dóu gènre Schistidium trachis en couissin pu o mens sarra e de coulour bruno à óulivo sus li roco cauquiero. Douno de ramo irreguliero que podon faire fin qu'à 5 cm d'aut. De proumié abord se recounèis à sis urno aurenjo 'mé uno couifo pounchudo roujo un pau espesso e peréu à si fueio en lanço verd-óulivo generalamen acabado pèr un pouncho ialino. Li dènt dóu peristome soun drecho e acabado pèr un pouncho bruno. La sedo jauno à aurenjo èi courteto (0,5 mm).

Usanço :
S'atrovo au nostre d'àutri meno dóu gènre Schistidium que ié sèmblo proun coume S. elegantulum, S. robustum, S. singarense nouma group Schistidium apocarpum.